5 ka akusado sa pagkamatay sa 2 ka mananagat sa Bohol gikiha na
Blogger Reymark Alcorcon / Bohol
Gipasakaan na og kasong Complex Crime of Murder ug Murder ang lima ka sakop sa Bantay Dagat sa Barangay Pitogo, lungsod sa President Carlos P. Garcia probinsya sa Bohol human gitudlo nga responsable sa pagbangga sa pumpboat sa duha ka mananagat sa kadagatan sa Barangay Malingin, lungsod sa Bien Unido nga miresulta sa ilang kamatayon alas 6 sa buntag, Biyernes, Mayo 2, 2025.
Matod ni Police Lieutenant Colonel Norman Nuez, information officer sa Bohol Police Provincial Office, nga ang mga gipasakaan na og kaso sa Provincial Prosecutors Office mao silang alyas Taga, alyas Nali ug alyas Amang ug laing duha ka John Doe’s nga pulos taga Barangay Pitogo.
Sila ang positibong giila sa mga residente sa Barangay Malingin ilabi na sa lain pa nga mananagat nga nakakita nga mibangga sa pumpboat nga gisakyan nilang Rene Awas Reyes ug B-Jay Manayon alyas Budon, pulos hingkod ang pangidaron nga nagpuyo sa Purok 5, Barangay Malingin.
Padayon pa’ng giila ang laing duha nga wala pa mailhi apan lakip na sa gipasakaan og kaso.
“Matod pa sa atong mga witnesses nga gagukod kuno nya duol napud kuno sa baybay so daghan ang nakakita. Diha poy mga kauban nga mananagat nga diha pud duol sa hitabo. Katong naka-rescue diba naa may video nga nagda didto daplin sa baybay nakaila pud sa mga suspetsado,” matod ni Nuez.
Tungod kay nahitabo ang insidente niadto pang Mayo 2, 2025, dili na sila mamahimong dakpon kon walay warrant of arrest.
Mipasabot si Nuez nga ilang gisunod ang proseso nga mao ang pagpasaka og kaso sa batok sa mga suspetsado ngadto sa piskaliya ug kon mapamatod-an nga dunay lig-on nga ebidensya, masang-at na kini ngadto sa korte alang sa pag-isyu og arrest order batok sa mga suspek.
Gipahibawo usab ni Nuez nga walay pulis nga nalambigit sa maong krimen sanglit pulos kini mga sibilyan nga sakop sa Bantay Dagat sa Barangay Pitogo, sukwahi sa mikatap sa social media nga mga polis ang nagpatay sa duha ka biktima.
Giangkon sa police official nga natukod ang mga Bantay Dagat sa kabarangayan sa mga isla sa probinsya sa Bohol tungod lang usab sa pag-siaw sa illegal fishing.
Sila ang gitahasan nga manakop sa mga mananagat nga nakalapas sa ordinansa sa lungsod nga migamit og illegal nga pamaagi sa pagpanagat sama sa Liba-Liba.
Ang maong matang sa panagat matod pa makaguba sa corals kay maigo sa pukot nga birahon sa ibabaw. / AYB