83 ka bus isyuhan og special permit atol sa Semana Santa

              Blogger: Reymark Alcorcon 

Ang Land Transportation Franchising and Regulatory Board (LTFRB) 7 nipahibawo nga moisyu sila og special permit sa mga bus aron madugangan ang kasamtangan nga mga rota padulong sa probinsiya atol sa Semana Santa nga gilaumang makasinati og pagdagsang sa mga pasahero.

Matod ni LTFRB 7 Transportation Development Officer Eugenio Ibo Jr., 83 ka mga bus ang gitugotan sa pag-operate sa mga rota nga nagkinahanglan og dugang biyahe.

Ang LTFRB 7 nagpahigayon usab og random inspection sa public utility vehicles sa mga terminal aron sutaon kon aduna ba silay permit (Certificate of Public Convenience), ug tukmang fare matrices.

Kini nga mga pagpangandam gihisgutan atol sa Kapihan sa PIA forum sa Huwebes, Abril 10, 2025, nga gitambungan sa mga opisyal sa LTFRB 7, Philippine Coast Guard ug Land Transportation Office (LTO) 7.

Nibutyag si Junior Grade Abel Jan Lomboy sa Coast Guard sa pagpaaktibo sa Malasakit Help Desks sa mga pantalan aron matubag ang mga kabalaka sa mga pasahero, ingon man ang pag-deploy sa Quick Response Teams alang sa emergency ug ang paggamit sa K9 units sa pagsusi sa mga ilegal nga butang.

Ang mga pre-departure inspection pahingusgan usab aron masiguro ang seaworthiness sa tanang barko nga molarga.

Sa ilang bahin, ang LTO 7 mopakatap og dugang mga personnel sa mga kadalanan sa tibuok Central Visayas ug sa tanang pantalan ug bus terminal.

Si LTO 7 Assistant Regional Director Engr. Arturo Apolinar nipadayag nga kining dugang nga presensya nagtumong sa pagpatuman sa mga balaod sa transportasyon ug pag-monitor sa publiko ug pribadong mga sakyanan.

Subay sa Holy Week exodus o ang pagdagsa sa mga pasahero sa mga bus terminal, pantalan ug airport, ang Philippine District Coast Guard 7 mopaubos sa heightened alert gikan sa Dominggo, Abril 13, hangtod pagkasunod Dominggo, Abril 20. / CDF